Bi maisu
Seko Higak nerabe zela ikasi zuen Naha-tea Kanryo Higaonna Senseirekin. Maisua hil zenean, 1915ean, haren ikasle aurreratuenarekin jarraitu zuen, Chojun Miyagirekin, eta ez zen gehiago haren ondotik aldendu: guztira, hogeita hamazortzi bat urte ikasten. Saiko Shihan Tamanok Miyagi Senseiren lehen belaunaldiko ikasleen artean kokatzen du, eta haien artean onena zela uste du.
Dojo propio bat
Polizia gisa egiten zuen lan. Lanpostu hori utzi zuen irakaskuntzari erabat emateko, eta hogeita hamarreko hamarkadaren hasieran dojo bat ireki zuen Nahan. Maisua bizi zen bitartean Miyagi Senseiren ikasle batek izan zuen dojo bakarra izan zen, eta Miyagi Sensei maiz joaten zen eskolak zuzentzera. Higa Sensei eta Miyagi Sensei izan ziren, garai hartan, Okinawan artea irakatsiz bizi ziren bakarrak.
1941ean Dai Nippon Butokukaik, arte martzialen Japoniako erakunde ofizialak, Renshi titulua eman zion. Saiko Shihan Tamanok bere maisuarenaren pareko ekarpen baten aitortza gisa interpretatzen du.
Hamasei urterekin iritsi zen ikaslea
1933 inguruan, bere etxetik gertu zegoen dojo hartan izena eman zuen Nahako arrantzale-eskolako ikasle batek: Seikichi Toguchi, etorkizuneko O’Sensei. Azkar ikasi zuen. Higa Sensei Okinawatik kanpora joan zenean Goju-ryua zabaltzera, hogeita hamarreko hamarkadaren amaieran, O’Sensei Toguchi utzi zuen dojoaren arduradun.
Gerraostea: maisua eta ikaslea
Gerrak lanik eta emazterik gabe utzi zuen. O’Sensei Toguchik, negozioa ondo zihoakionez, bere etxean hartu zuen eta aurrera ateratzen lagundu zion. Higa Sensei lekuko izan zen Harukorekin egin zuen ezkontzan, 1947an.
Elkarrekin hasi ziren berriro irakasten, lehenik O’Sensei Toguchiren etxean. Laster ohartu ziren Higa Senseik dojo propio bat behar zuela, eta Jinsei Kamiya medikuaren laguntzaz, hura ere Miyagi Senseiren ikaslea, Itomanen ireki zuten. Gerraren ondoren Okinawan ateak ireki zituen lehen dojoa izan zen.
Okinawako eskoletan, maisuarekiko errespetua egintzekin erakusten da. Miyagi Senseik etxea eman zion Higaonna Senseiri zahartzaroan. O’Sensei Toguchik gauza bera egin zuen Higa Senseirekin, eta bere dojoa altxatzen lagundu zion.
Miyagi Sensei hil ondoren
1952an Gojuryu Shinkokairen sortzaileetako bat izan zen, Miyagi Sensei buru zuen elkartearena. Maisua hil zenean, 1953an, Higa Senseik haren ikasleen gidaritza hartu zuen. Elkarte berriko presidentea izan zen, Gojukaikoa, eta bera izan zen Goju-ryuko dan mailak lehen aldiz eman zituena, 1956an.
O’Sensei Toguchik orduan berak sortutako hastapeneko katetako bat irakatsi zion, Gekiha Dai Ni. Bere lehen maisuaren erreakzioa Saiko Shihan Tamanoren ikastaroetako oharrek jasotzen dute: kata hura berak sortutako hastapeneko kata guztien giltzarria zela esan zion.
«Masters Seko Higa and Seikichi Toguchi were the only students of Miyagi sensei’s who carried on his vision.» («Seko Higa eta Seikichi Toguchi maisuak izan ziren Miyagi Senseiren ikasleen artean haren ikuspegiari jarraipena eman zioten bakarrak.») — Saiko Shihan Toshio Tamano
Hain ezaguna ez den izen bat
Higa Sensei 1966an hil zen, hirurogeita zazpi urte zituela. Haren izena ez da bere maisuarena bezain ezaguna. Hala ere, hura gabe ez da leinua ulertzen: Higa Senseiren dojoan ikasi zuen O’Sensei Toguchik oinarrizkoa, eta haren eredua izan zen maisu bat zaintzeak zer esan nahi duen irakatsi ziona.